Igl uoppen da Tujetsch

pdfUoppen da Tujetsch

UoppenTujetschIgl uoppen dalla enconuschenta famiglia de Pultengia ei daventaus uoppen dalla vischnaunca da Tujetsch. La damonda d'in uoppen per la vischnaunca ei sefatga ils onns curonta.
Il cantun ha fatg sias pretensiuns e la vischnaunca ei sedecidida igl onn 1947 deffinitivamein per l'arma dils de Putnengia. La decisiun ei stada leva , veva quei uoppen gia representau la vischnaunca cun caschun dalla exposiziun a Turitg, igl onn 1939.
UoPutnengiaIgl uoppen sez ei concepius tenor vegls documents e maletgs digl uoppen. Sulettamein la punt denter las duas tuors ei per la letga pli liunga che tier igl original.

- Uoppen dalla famiglia de Putnengia ella sala da dertgira ella Cuort ligia Grischa a Trun.

Sch'ins sfeglia denton en vegls documents che pertuccan nossa vischnaunca croda en egl il vegl sigil da vischnaunca. In sigil interessant e che fa surstar. El representa il patrun-baselgia dalla parochiala da Sedrun, igl uestg s.Vigeli da Trient/Italia. Dretg la palma dil martirer, seniester il stab digl uestg e sil maun porta el ina baselgia, sco segn dil fundatur da bia baselgias. L'inscripziun dil sigil secloma:
"SGILIUM COMUNITATIS AETHUATIENSIS", quei vul dir il sigil dalla vischnaunca Aethuatia, Tujetsch.Sigilvegl

Il num Tujetsch cumpara l'emprema gada 1237 ed il document plaida dils "Vicini da Tuvez", dils vischins da Tujetsch. Da quei temps po bein esser naschida la vischnaunca da Tujetsch. La pli veglia purgameina sigilada cul sigil da vischnaunca datescha digl onn 1681. Igl ei quei ina brev da hipoteca da Jakob da Rinau alla pervenda da s.Vigeli per 84 flurins, segirau cun casa, bein e schischom a Plounca sur Camischolas-sura, encunter in tscheins annual da 3 rizzers per mintga flurin.

Segiramein existeva gia avon in uoppen. 1380 secloma ei denton aunc en in document: "won wir lüten von Thyfetz aigner insiglen nit han". L'inscripziun muossa ora ch'il sigil seigi buca vegnius creaus entuorn 1560. Gliez onn croda per l'emprema gada il num falliu per ils Tujetschins, numnadamein ils Aethuatiers. Quei sbagl va anavos sin Egidius Tschudi. El ha pretendiu ch'ils Aethuats seigien in pievel alla tgina dil Rein, il pievel spel Reinanteriur. Consequentamein ein ils Tujetschins en quei mument daventai fallidamein descendents dils Aethuats. 1867 curregia il historiograf A.Gatschet il sbagl da Tschudi. El, Tschudi, haveva buca legiu exactamein il historiograf grec Strabo che metta ils Aethuatiers spel Rein posteriur damaneivel dalla Adda. pdfNum

Sin l'emprema carta svizra da 1496 cumpara il num Dauetsch e buca Aetuatia. Suenter il sbagl da Egidius Tschudi ei il num Aetuatia signivaus en cudischs e sin cartas. Aschia era tier Campell 1571, Guler 1616, e Scheuchzer 1716. Schizun igl enconuschent historiograf Joh. von Müller porta l'idea da Tschudi ch'ils Tujetschins seigien descendents dils Aethuatiers ed hagien retschiert da quels lur num. El vegl anniversari da s.Vigeli 1456, entscheiva in rapport suandontamein: "Fuit olim hic in Aethuatia...... (Ei viveva antruras cheu en Aethuatia...) Ils divers plevons ella val han medemamein pil pli fatg diever da quella versiun, aschia ch'il num Aethuatia ni Aethuatiers cumpara savens els cudischs da battens, letgs e mortoris dapi 1664 tochen viaden la secunda mesadad dil 19avel tschentaner.

A.Gatschet, che fa la necessaria correctura pertuccont ils Aethuatiers/Tujetschins ei dil meini che Tujetsch, il num, derivi dil plaid tigia/tegia cun la finiziun collectiva -etia. Pia la muntada: Val da tegias = Tujetsch.

Quella interpretaziun dil num po bein esser pli verdeivla che la derivonza dils Aethuatiers, che vivevan en tut in'autra cuntrada. Entras la correctura da Gatschet e lavurs publicadas da W.Derichsweiler, in anteriur fautur ed amitg da nossa val, ei il num Aethuatia svanius ord cudischs, cartas e tgaus.

Daco han ins denton schau d'ina vart igl anteriur sigil cun igl uestg s.Vigeli.? Pervia da quei sbagl? Quals ein bein stai ils motivs? Retschercas en protocols da suprastonza e vischnaunca han purtau negin sclariment. Tuttenina ei il vegl sigil staus ord moda e dapi biabein tschunconta onns survescha igl uoppen dalla famiglia de Pultengia sco arma da nossa vischnaunca.

Co fuss ei da far la midada e turnar anavos tiegl anteriur sigil/uoppen da s.Vigeli.? El ei bein pli tipics per nossa vischnaunca, sebasa sin veglia tradiziun ed ha funcziunau plirs tschentaners sco sigil da vischnaunca.

    UTujetsch  Atgnamein stuess igl uoppen veser ora sco cheu dasperas.
Aschia fuss el dallas colurs anora pli adattaus agl original!

  logoTujetsch   Il logo da Tujetsch, creaus 2006, sebasa sin igl uoppen da Tujetsch!

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia_gruen.jpg