p5(Cudisch da Tujetsch 1987) Ina veina clar grischa da scalegl setila silla costa dretga dalla vallada dil Rein e mira ora odem la Val Sumvitg epi danovamein a Mumpé-Medel ed a Nual, tonscha sur l'aua vi sil Calmut e dat la davosa cuchegiada a Hospental.

En scadin cass ch'ils vischins da Tujetsch ein dai avon biars onns sil crap scalegl, schebi ch'ils emprems indrezs da scaldar ein stai empau pli sempels, sco per semeglia far cauld plattas da crap e far pegnas da mir. Dallas empremas pegnas da scalegl pudessen datar neu digl onn 1740, forsa; per pressapauc 100 onns pli tard ein las pegnas scalegl sefatgas per propi. - Ed igl ei pli che mo remarcabel che ual glieud d'ordeifer ein s'empitschada dil scalegl ella val. Ins sedamonda, schebein ils Tuatschins vevien buca raps, ni forsa e buca regl d'interprender enzatgei.
Ils anno 1867 muentan in Colblezer dad Amsteg ed il Walker da Schattdorf la damonda d'explotar il scalegl ella Val Tujetsch. Ils Tuatschins fredan l'aura e setenessen plitost cun in'offerta da nossas varts. Ed els scrivan ora il crap ella Gasetta Romontscha. Collemberg e Bisquolm da Mustér s'annunzian e la vischnaunca lai vi la veina.
Probablamein ei l'interpresa nuota sefatga dil meglier; igl interess ei tschessaus ed igl onn 1897 conceda Tujetsch gratuitamein scalegl alla claustra da Mustér per ils altars ella baselgia da Nossadunna. –
Pauc sissu, igl onn 1901, sefa danovamein in contract denter Tujetsch e Gion Battesta Collemberg, 20130206 125638pigner a Mustér, e quei per Calmut e Nual; ins ei vegnius perina per 5-6 onns cun explotar ina tiarza dalla crappa a Nual e las autras duas sil Calmut, in cun l'auter denton buca dapli che 1200 peis. Las indicaziuns ella scartira ein da muntada:
- ils prezis ein fixs e muntan per Nual 15 raps, per Calmut 12 raps il pei, quei che fuss matei pressapauc 30 m3
- fender e buca sittar la crappa (lavagar la pastira)
- finir en in liug avon ch'entscheiver en in auter (serasar!)
- il scalegl ei da dar giu als Tuatschins per 60 raps il pei ella mina
- las cauras pil latg han il dretg da pascular gratuitamein
- il fein pil letg e la lenna morta ein semegliontamein da dar giu per nuot

All'entschatta ha la fatschenta cun dr. G. Brauchlin da Mustér, quella da calonda october 1916, fatg ina hazra pareta. En num dalla ovra da talcum a Sumvitg/Surrein fa el amogna pil scalegl en Tujetsch la summa da 1000. - francs mintg'onn e per in vagun da 10 tonnas treis francs l'in e sch'ei survarga ils 500 vaguns per onn, allura 4. - francs il vagun. Entochen che l'explotaziun entscheivi per propi, s'oblighesch'ins da pagar annualmein 300. - francs. Culs 15-6-1918 mida il tgamun num e secloma da lu enneu Montan- u. Rohstoff AG, Mustér. Alla testa stat dr. G. Brauchlin, il parsura dil cussegl d'administraziun. Culs 14-1-1919 seretila la fatschenta dil contract e fa valer ch'ins vevi fatg il quen cun la viafier dall'Alpsu che vegni ad interim buca baghegiada. La suprastonza da Tujetsch sevolva tier igl advocat dr. G. Willi da Cuera che cusseglia da secunvegnir; ei vali buca la peina.
Denteren lavura il cavacrappa Remigio Locatelli, sesents a Sedrun, ella cava sil Calmut, ferton ch'il pigner Johann Jacomet dad Acletta tschenta repetidamein damondas alla vischnaunca per prender si il Calmut, sco per semeglia ils onns 1912, 1913 epi ils 9-1- 1927. La finala secunvegn la vischnaunca cun Gion Battesta Jacomet Flury d'Acletta per il prezi da francs 20. - il m3; el dueigi sez denton secunvegnir cun Remigio Locatelli pervia dalla cava sil Calmut. A Nual perencunter ei Gion Battesta Jacomet persuls e paga francs 40. - per il m3. Denter Calmut e Nual ha ei dau da sestrer, tocca ch'ins ha spartiu las duas cavas. Naven dils anno 1933-1937 ha il cavacrappa Giusep Berther da Gonda/Sedrun giu la cava dil Calmut, Gion Battesta Jacomet dad Acletta encuntercomi ei secuntentaus cun Nual e quei cun adina puspei renovar ils contracts entochen 1947.
Explotaziun a Nual 1943: 4.55 m3 a 50. - francs = 227.50 sco indemnisaziun alla
vischnaunca da Tujetsch.
Schebi ch'ils Tuatschins sezs han nuota propi vuliu morder en, ein els ora ed ora stai dall'idea ch'ei selaschi far daners cul scalegl. Nual ei damaneivel dalla «gliut da dadains gl'uaut» e 4 giuvens da Selva: Venzin Benedetg, Venzin Stiafen, Loretz Gaudenz e Deflorin Pieder fan in contract cun la vischnaunca arisguard l'explotaziun a Nual. La scartira datescha dils 10-11-1944, ina cunvegnientscha da dus onns cun indicaziuns sco las ulteriuras. Enzatgei onns avon fuvan era Giusep Zazzi e fegl s'interessai per Nual e per Calmut.
Cun ina brev dils 27-7-1950 s'occupeschan Benedetg Valier e Baseli Schmed cun la cava a Calmut, ina damonda alla vischnaunca che manegia veramein serius. E la suprastonza communala rispunda ch'ella seigi ad interim ligiada e sappi buca far cunmeins.
Atgnamein naven digl onn 1942 ei Carli Baselgia da Cumpadials a Langenthal sespruaus da vegnir en contact pervia dalla cava sil Calmut. Finalmein vegn el a sté ed ils dus contracts dils 12-6-1945 e quel dils 22-7-1946 plaidan d'in spert serius d'interpresa. - Dalla biala entschatta enneu ein las difficultads vegnidas grondas; Carli Baselgia ei sestentaus scosauda ed ha dau lavur a passa in tozzel luvrers indigens. E per ses 35 m3 digl onn 1946 ha el tuttina pagau alla vischnaunca da Tujetsch 1575. – francs e suren aunc 12 vaguns material manedel a frs. 5. - il vagun.
122bPer in um persul fuva la fatschenta onz greva; a Sedrun sefuorma ina societad d'aczias «Ovra da pegnas da Tujetsch, SA Langenthal». La speronza ei carschida il mument che la firma nova ha baghegiau in baghetg silla ravera dil Drun a Sedrun. (Oz casa da colonias da Clemens Monn-Gamboni.) La taxa dils 10 raps per 1m3 occupau ei tuttavia buca stada giud via.

Cun la cunvegnientscha dils 26-6-1946 ei Gion Giusep Jacomet da Mustér semess en a Nual; cun ina dunna da Tujetsch eis el scochemai staus da casa ella val ed il contract muossa buca ora puncts apartis. L'explotaziun ei sefatga e secloma:
- 1955 6,33 m3 = francs 316.50 (pia à frs. 50. -)
- 1956 3,74 m3
- 1957 2,68 m3
- 1958 3,98 m3
- 1959 6,55 m3
Lein dir ch'ina pegna ordinaria drovi approximativamein 0,3-1,5 m3 scalegl schubergiau. Ton che Gion Giusep Jacomet fageva al pli 15 pegnas mintg'onn. Ed el ei staus in bien contrahent ed ha adina puspei renovau il contract a Nual e quei entochen sia mort prematura dils 26-10-1974.

Pervia da pagaments ha la vischnaunca da Tujetsch visau il contract calonda matg 1954 e l'Ovra da pegnas a Tujetsch ha buca acceptau la visada. E la finala eis ei tuttina iu en nuot. La collaboraziun cun la Serpentina a Hospental dils 20-10-1965 ei era buca sefatga ed ei semegliontamein dada ell'aua. Cun l'interpresa dalla Serpentina SA ad Erstfeld eis ei buca iu bia meglier. La cunvegnientscha dils 5-10-1971 veva giu priu ina stupenta entschatta cun ina taxa annuala da francs 4000. - (in'explotaziun da 250 m3 = francs 4000. -) e per ulteriurs m3 francs 15. - l'in e per ils curdems (rauba manecla) accurat il medem prezi. Ed il resultat ei puspei staus poverets, plitost disgusts e visadas ufficialas per vegnir en culs raps.

Dapi igl onn 1976, naven dils 1 d'avrel, ei Barclamiu Berther, tschentapegnas a Sedrun, in explotader da num sil Calmut. El ei s'obligaus da pagar francs 120. - il m3 ni silmeins ina summa annuala da francs 800. -.
Igl avrel 1981 ei Barclamiu Berther semess en cun la firma Murer SA Tujetsch e las pegnas d'ozildi sevendan bein, aschia en vesta dallas historias ch'ins ha cugl ieli. Ina survesta en nos dis muossa ora:
- pegnas pintgettas (70 x 60 x 80) frs. 4-6000
- las ordinarias 100 x 100 x 30) frs. 7-8000
- quellas cun baun pegna ed aschia vinavon frs. 18 000
- ina execuziun da luxus frs. 30 000
L'explotaziun sil Calmut ei carschida da detschiert e la crappa vegn tagliada a Schmerikon ella grossezia da 10 cm, quellas plattas che tuornan allura a Sedrun el luvratori giul Drun. - Buca meins che treis luvrers stattan vidlunder ed han fatg per semeglia igl onn 1984 ventgaquater pegnas. Ed igl onn 1985 ha la firma Murer SA Tujetsch explotau 41,574 m3 e paga alla vischnaunca pil m3 francs 120. -, pia ina summa da francs 4'988,90.
Il svilup enteifer ils davos 80 onns ei singulars:
1900 ha ina pegna custau frs. 80 - 100
1930 frs. 200 - 250
1950 frs. 650 - 800
1980 frs. 7000 - 8000

Fontaunas
Gadola, Guglielm. La Cadi, dal pugn da vesta economic ed industrial. En: Il Glogn, annada 22/1948, p. 80-122
Venzin, Gion Antoni. Extract dils protocols da vischnaunca 1838-1948. Privat. Giusep Alig-Venzin, Salins
Cudisch da Tujetsch, 1987


Ella Tuatschina digl onn 2010 ei la lavur da patenta digl onn 1993 da Madleina Vinzens, Sedrun, vegnida publicada. Il tema ei staus Pegnas scalegl tuatschinas. Per la translaziun ella Tuatschina ei Norbert Vinzens staus responsabels. pdfPegnas scalegl tuatschinas


pdfIl taglia crappa Giusep Berther.Sur dad el ha Norbert Berther, Camischolas/Zarcuns, scret a caschun da siu 85avel di da natalezi. Cumpariu ella Tuatschina 1998.


La pegna scalegl
(Guglielm Gadola en Il Glogn, annada 22, 1948, paginas 87-91)
Avon che intrar silla impurtonza e svilup dalla hodierna industria da crap-scalegl en Tujetsch lein nus tedlar in Tujetschin che ha studegiau cun amur e premura la questiun dìl crap-scalegl en Tujetsch ed en auters loghens. Signur Gion Antoni Venzin da Rueras, in sincer e scaldau amitg dalla nov'industria, communichescha a nus il sequent interessant artechel:
Nossa pegna
Con savens audan ins a schend nos vegls ni nos malsauns che ston star en stiva: "Oh, sch'ins vess buca quella buna pegna, con mal ins stess".Quei vala tuttavia en nossas relaziuns cun liungs unviarns e perfin cun enqual stad freida e ruha. Ina biala pegna, ornada cun las inizialas dil patrun, cull'annada ed ils ss. nums ei per la stiva in dils pli bials ornaments. Quel ch'ei staus empau pil mund entuorn, ha forsa era fatg stem dallas differentas pegnas: pegnas-fìer da bischel, da tiaracotga, da mir; lez ha era fatg stem dil different cauld e fried e seregurdau cun plascher vid igl emperneivel e migeivel cauld da nossa pegna-scalegl, che vegn era numnada "pegna tuatschina". Il scalegl, il material dalla pegna ei in product natural, in crap.
p6La surfatscha da nossa tiara consista ord differentas formaziuns. Nossa Surselva per exempel ei serrada giu dal septentrium d'in'aulta, massiva cadeina da cuolms granit, da gneis ect. A pèr cun quella cadeina va sco ina gronda faulda nossa val dil Rein. La val e nos cuolms da maun sut en general, han survegniu quella largia, rundada plascheivla fuorma, perquei ch'ei schaian sin ina formaziun, in terren da platta morta (Schiefer). Quei grep marsch, smulus, grisch-blau ni mellen, ei el decuors da millesis sesruinaus entras l'aua, darguns e lags, che ha lu dau quei bien tratsch, in bien tschespet che cuviera cuolms e vals. Ins paregli mo las vals d'Uri ni Glaruna, cun la Surselva! Entras quella formaziun setilla ina aveina da scalegl (Talgschiefer, Lavezstein) ch'ei veseivla, ni scuvretga daven, d'odem la Val Sumvitg, sut Mumpé-Medel, tras Tujetsch, dretg dil Rein, entochen si Calmut ed aulza aunc ina ga il tgau a Hospenthal. Quei crap d'ina colur grisch-alva all'entschatta, sestgirenta lu, ei pli loms, mo era pli grevs ch'il crap ordinari. Il scalegl ei da tuccar sco da savun (Speckstein) e cuntegn in cert grass. Sia valeta consista en la quasi perfetga resistenza al fiug e ch'el mantegn il cauld pli ditg che scadin auter material.
Cu nos vegls han fastsau il scalegl savein nus buca dir; forsa casualmein cun scaldar plattas per sescaldar. Il patratg da far pegnas cun quei erap vegn ad esser naschius per cun l'erecziun da casas pli confortablas, silmeins partidas en stiva e cuschina. Segir eis ei, ch'il scalegl era encunuschents sil pli pauc avon dus, treis tschentaners (Mira: Glogn. 1936, las cavas da Mumpé-Medel). Mo tier nies pievel ch'eì buca ual scaldaus per novaziuns e svilup, ni era entras las circumstanzas ch'ins vegneva a duvrar plitost crappa anflada, che sluppava lu, ha l'explotaziun da scalegl fatg plaun progress. Jeu seregordel aunc d'in pèr pegnas da mir cun crap ordinari. Ei para bunamein che mo ils beinstonts schavien far en pegnas-scalegl. Era il transport vegn ad esser staus fetg difficultus.
p3A Rueras per exempel existan pegnas da 1740, 1790; ina tut aparti biala pegna de 1773 cun l'ama Beer davon e l'arma de Castelberg d'ina vart, artisticamein enramadas. Remarcabel eis ei denton che la gronda part dallas pegnas, ch'ins anfla en casas veglias, dateschan dils 1840-1860.
Cul temps han ins entschiet a s'ìnteressar er'ordeifer nossa val dil crap-scalegl. Anno 1867 damondan in Colblezer dalla "Punt" (Amsteg) ed in Walker da Schattdorf la vischnannca da Tujetsch, da far ora scalegl a Calmut. Sin quei scriva la vischnaunca ora la cava ella Gasetta Romontscha e lai vi l'aveina a Collemberg e Bisquolm, che luvravan era a Mumpé-Medel, per treis onns, à 16 rps. il pei (ca.30 cm3), per far ora 100 pegnas da 50 peis (?). La vischnaunca ha denton stuiu prolunghir il termin ed igl'ei da supponer che l'interpresa hagi buca fatg cucagna. Decennis suenter plaida ins pauc dil Calmut. 1897 conceda la vischnannca (gratuitamein) alla claustra da Mustér da far, ora si Calmut il scalegl pils altars (mensa) dalla baselgia nova da Nossadunna. Enzatgei pli tard ha il tagliacrappa Locatelli fatg ora leu enqual pegna ed era serpentin per monuments. Calmut era anzi allontanau ed ins ha cul temps luvrau ella cava da Nual, che veva adina furniu enqual pegna. Entuorn 1900 luvravan leu Giger e Manetsch da Mustér; pli tard ed aunc ussa Battesta Jacomet d'Acletta, Mustér, en quella cava. El lai vegnir la crappa cun suga neuvi il stradun a Carmihut. Er'en Tujetsch vein nus enzacons meisters-pignèrs. Las pegnas da purs han anflau la via per ualti tut las valladas grischunas - e beinenquala schizun ordeifer nies Grischun. Ina pegna ordinaria drova ca. 0,3 -0,5 m3 scalegl schubergiau e custava entuorn igl onn 1900 80 – 100 frs.; avon zacons onns 250 - 280 frs.
en Tujetsch! Denton per far ordlunder in'industria muncava l'iniziativa, ils mieds finanzials e la necessaria reclama.

 

La nova industria da scalegl a Tujetsch
Tut auter sepresenta oz la nov'industria dil scalegl en Tujetsch. Quella ha priu si'entschatta 1942 - e buc en Tujetsch. Igl iniziant e curaschus interprendider da quella, ei per cletg e ventira in affon dalla Cadi, e quei ei segir la megliera capara che la caussa vegn a seconsolidar, ch'ella vegn a crescher euccesivamein e sesviluppar ad ina bun'ovra economica e sociala per Tujetsch e la Cadi.
Tard gl'atun 1942 ha signur Carli Baselgia da Cumpadials, staus naven ina partida onns per seperfecziunar el mistregn da meister tschentapegnas, in pignèr (Hafnermeister) fatg o crappa scalegl en Val Sumvitg cun treis da ses frars e spediu quei material a Langenthal, nua che quel ei vegnius elaboraus per pegnas sin emprova. Deplorablamein cunteneva quei crap da Val Sumvitg memi bia aveinas da cristallas e cheutras semussaus nunduvreivels. Il mars 1943 ha Carli Baselgia calau cull'explotaziun da crappa en Val Sumvitg e schau scher la caussa entochen ils 5 da zercladur 1945. Cheu ha in bien e fideivel client dalla fatschenta da pegnas da Carli Baselgia a Langenthal, giavischau che meister-pignèr Carli Baselgia tarmetti ad al egl Jura bernès onn per onn 10-12 vaguns blocca-scalegl. Quei cass ha dau curascha al giuven interprendider Carli Baselgia da far contract culla vischnaunca da Tujetsch, ch'ei stada ualti dira, sch'ins patratga ch'ei setractava cheu d'in'enschatta che sa purtar in di, oravon tut alla vischnaunca da Tujetsch, il pli grond profit e gudogn. Ins astga numnadamein mai emblidar ils gronds cuosts da transport giu da 2000 m.s.m. Mo tgei quei cuosta! Igl autur da quest studi selubescha da far cheu l'objectiva remarca, ch'ei capeta buca da rar che vischnauncas e cantun surprendan in'interprider gia alla bial'entschatta, aschia che sia interpresa sto bunamein a frusta e sa onns ed onns buca sesviluppar sco'la duess. Quei astg'ins numnar: Cuorta vesida e negina capientscha per l'atgna economia! Il material, il crap da Tujetsch, schebi ch'el vegn oz aunc stermentus cars als exploraturs, ei silmeins buns, q. v. d. dirs e ferms e perquei bein adattaus ed era pli schubers per l'elaboraziun, ch'in crap onz lom.

Entochen gl'atun 1945 ha signur Carli Baselgia explotau, cun agid da ses frars, 4 - 5 vaguns pulit material, mo siu client pagava ad el mo il pli bi e tschel salvav'el per nuot. La vischnaunca da Tujetsch denton, risguardava buca quei e pretendeva per tut il material spediu ton e ton il m3, vegni il crap lu pagaus tut per buns agl explotader, ni buc! Quentan ins uss aunc la lavur, il transport entochen alla staziun ed il cargar il vagun, stuess ins nuota sesmarvegliar, sche la vischnaunca cun sias grondas pretensiuns, vess gleiti ella sezza strunglau l'entschatta da si'atgna industria! Sut talas circumstanzas vess meister-pignèr Carli Baselgia gleiti stuiu ceder, mo cheu ha el priu la curascha (1946) da buca mo far ora il material; anzi, d'era sez elaborar quel a Langenthal en si'atgna fatschenta e da lu metter las pegnas fatgas al commerci.
Vegnend el quell'uisa pli e pli enconuschents cun tut las qualitads dil crap e vesend che quel era bials e buns, ha signur Baselgia survegniu fidonza ell'entira interpresa, buc il davos era per motiv che sia clientella survegne¬va e demussava pli e pli grond plascher per quellas plattas e pegnas da stupenta qualitad e paretta. Quei emprem success e satisfacziun ha dau in niev stausch vinavon, suenter haver dumignau las empremas difficultads. Per saver luvrar pli razioneivel, ha cl mes neu in compressur per 10'000 frs. ed aschia procurau per lavur e gudogn a 10 - 12 luvrers indigens, explotond entochen igl atun 1946 circa 35 m3 blocca-scalegl e circa 12 vaguns material manedel.
Custond l'entira interpresa pli e pli e vegnend ils cuosts memi gronds mo per in del, ha Carli Baselgia fundau ils 16 da settember 1946 l'aschinumnada firma: Ovra da pegnas da Tujetsch, SA Langenthal (Ovra a Tujetsch). Per tudestg: Tavetscher Specksteinwerk AG Langenthal (Werk in Sedrun). Ils commembers da quella ein: Signur Anton v. Däniken, apothecher, Burgdorf, president; signur Max Jff, marcadont, Langenthal, directur mercantil e Carli Bascelgia, directur tecnic. Il capital, pagaus ella SA munta sin frs. 100'000, da scadin ina tiarza. Leutier vegn aunc in credit blanco da frs. 80'000.
1947 ha la nova firma baghiau in stupent baghetg a Sedrun, nua che ual il mument vegnan endrizadas ina partida necessarias maschinas, aschia che la nov'industria, ch'empermetta da daventar in'interpresa zun solida, sesanfla oz ella val sezza e che la rauba, elaborada a Sedrun, vegn tarmessa dacheu anora per l'entira Svizra entuorn.
Oz occupescha la nova industria de crappa-scalegl gia 14 luvrers duront igl entir onn ora - tut vischins de Tujetsch!
La principala producziun dalla nova industria ein las pegnas-scalegl, tenor sistem dallas pegnas da quadrels (cachlas), q. v. d. dallas pegnas da tiaracotga, per scaldament central, seigi lu entras scaldament d'aria caulda, ni entras scaldament d'aua caulda. Dapli metta la nova firma era neu pegnas-scalegl, tenor il vegl e beincumprovau stil da nos vitgs, cugl essenzial progress ch'il cauld vegn tratgs meglier a nez, entras endrizzar pli bia tratgs (tillas) e furnels, ni schizun cun rors da cuschinar. Ei vegn era fatg bauns-scalegl vid la pegna, per nezegiar ora meglier il fiug. Semiglionts bauns vegnan era fatgs vid plattas de fiug (da cuschina), per scaldar stiva e combras. Igl indrez ei quel'uisa che cun ina pegna-scalegl eis ei oz pusseivel da scaldar mintga combra e stiva d'ina habitaziun. En general vegn il material tagliaus ora sin mesira, pinaus dad A entochen Z, e lu schau tschentar en sil plaz las pegnas dils tschentapegnas.

Sin special giavisch surpren era la firma quella lavur e lai lu execuir ella entras prima mistergners, survigilond igl entir product ed indrez entochen che quel ei bein en funcziun.
Dapli fa la nova industria da Tujetsch era monuments, plats da meisa per terrassas, tablegiaus en aulas pli grondas ed era ils cheminées (tgamins-salun) en casa e villas da luxus. In'autra spezia da products scalegl vegn en cuort era ad esser: mobilias, ornaments e diversas sorts de termagls.
Il meterial manedel vegn tratgs oz a nez aschilunsch sco pusseivel. Quel vegn tarmess a Turitg, nua ch' el vegn miults en frina e daventa quella uisa duvreivels sco materia prima per plirras industrias, isolaziuns ect. ect. - In tal mulin vegn medemamein a vegnir endrizzaus a Tujetsch, Sedrun, aschigleiti che las finanzas lubeschan da far quei ulteriur pass anavon.
lls interessents dils products dalla nova industria tuatschina creschan ad in crescher, schebi che la firma sezza ha aunc fatg negina reclama; in clar mussament ch'ils products da crap-scalegl, explotai, empalai e fabricai entras in dils nos, vegnan a survegnir in bi e prospereivel avegnir.
Ins astga bein haver speronza che taglias da vischnaunca e cantun straunglien buca gia all'entschatta ina tala interpresa ch'ei in di el cass da dar paun e gudogn a biars che stuessen tschell'uisa far il fagot ed ira dalla tiara giuadora. Era ina vischnaunca purila duess saver, ch'ins sa pér mulscher, cura che la vacca ha schau giu latg . . ..
Igl autur da quest artechel ei ferm perschuadius che la giuvna industria da crap-scalegl a Tujetsch - ed in di forsa era en autras vischnauncas dalla Cadi - vegni ad haver in bi avegnir, no sto nies pievel puril muntagnard capir che quels curaschus umens iniziativs, ein cheu per survir ad el - e lu survescha el cul temps era alla nova interpresa. Perquei ha ei num better en dies il vez naziunal grischun: la scuidonza, ch'ei adina en fetgas e temas ch'in u l'auter dils nos savessi vegnir si da tgau.
Tutta honur ed engraziament a quels umens che sestentan e semurtiran da procurar per lavur e gudogn a nossas cuntradas da zun magher menaschi puril. Els han senza fallir melli ga da pli merets che certs politichers che declameschan mo frasas e bahaultschas socialas ed economicas!
Signur Carli Raselgia, affon dalla Cadi, attaschaus a sia patria, ei in um da stupentas qualitads da caracter. Siu senn ei en tut positivs e beinvulents. El ei naschius, sco el sez di, per survir a Diu ed a ses vischins, patertgond che la veta humana seigi in cuort mument, nua ch'ins ha la pusseivladad da dismetter il schliet en sesez, entras bunas ovras. Vegli il Segner benedir sia biala missiun social-economica en favur da nies pievel dalla Cadi.

20130104 102703

Sin pegna la crappa da scalegl ch'accumpognan
las notgs d'unviern ils affons sco scaldament enta letg!


Notizias ed extracts ord ils protocols da vischnaunca dil 19avel tschentaner

Pader Placi a Spescha 1805:
Sulettamein il crap scalegl ed il crap da caltschina vegnan explotai.

Els protocols da vischnaunca dil 19avel tschentaner
25 d'october 1846
3. Ha signur mistral Venzin purtau avon, ch'ei seigi ina societad, che vegli prender si per tscheins il crap, ni la gruoba da crap scalegl sil Calmut per sis onns, ei surdau ad el da cun quels corrispunder, ei aber adina entelgiu cun rapportar, avon che serrar accord, alla ludeivla vischnaunca.

26 da zercladur 1867
3. Eis ei vegniu mess avon ch'ei seigi dus ...... digl Uri, Calblezer dalla ..... e Joseph Valcher da Schattdorf che veglien prender dalla vischnaunca il grep da pegnas a Calmut. Ei lura discutau dalla vischnaunca da scriver ora ella Gasetta Romontscha ton pli spert la concurrenza e sin dumengia mirar da saver s'entelgir cun quels che han dau en e quei ei schau sura als geraus cun lura rapportar alla vischnaunca.

5 da fenadur 1867
3. Eis ei vegniu mess en ingant il Grep da Calmut dil crap scalegl e quei per treis onns, cumpriu igl onn present e finend quels treis onns, 1869, october, ils 30, sco ei da ver ella brev tschentada si da quellas varts las obligaziuns. Ei allura fercantau e dau al Columberg e Biscuolm da Mustér e ston pagar 16 raps il pei e las spesas da mesirar. El medem temps eis ei era fixau, ch'ils accordants pon far ora mo 100 pegnas en quels treis onns da 50 peis ina e buca dapli ed era buca dameins, pon aber ils accordants era far ora ord il sura indicau quantum, buca mo crappa per pegnas, sonder d'autras sorts sco els anflan per bien.

15 da november 1867
4. Eis ei vegniu legiu giu la brev d'accord per il crap scalegl da Calmut fatga cun Biscuolm e Columberg. Ei lura dalla vischnaunca vegniu fatg duas observaziuns, las qualas dueien vegnir remediadas ella brev digl accord. 1. enstagl 15 raps 16 il pei, 2. eis ei da buca schar tier pli ch'il quantum ch'era fixaus el protocol da tschien pegnas a 50 peis ina.

1 da matg 1868
4. Eis ei turnau a leger giu igl accord davart il scalegl da Calmut alla vischnaunca ed ei da quella vegniu approbau tut sco el ei screts.

14 da november 1869
3. Eis ei vegniu mess avon ch'ils accordants dalla scaleglia damondien suspensiun, sco era da far enqual via per trer pli cumadeivel la crappa. Ha la vischnaunca concediu mo per in onn, nua ch'ils accordants dueien far tut siu pusseivel ch'ei vegnien buca pli cun supplicas da suspensiun, sco era dau tier da far vias da menar la crappa, sch'ei seigi da basegns.

29 da matg 1871
9. Eis ei da vart da meister Cadalbert e Biscuolm vegniu dummandau la vischnaunca suspensiun per il crap scaleglia da Calmut ed ei quella vegniu suspendiu per entochen d'atun, bein aber sche pusseivel seigi far fin cun igl accord.

22 da november 1889
3. Ei concediu a Gurdin Flepp la damonda dalla gruoba da scaleglia egl Uaul Nual, cun schar luvrar treis onns suenter plascher. Da schar marcadar la suprastonza cun il sura mo per in ton il pei e puspei schar approbar la vischnaunca.

29 da settember 1889
4. Ei mess si per la scaleglia digl Uaul Nual 15 raps il pei. Ad in vischin da vischnaunca, che vul far ora per siu diever, ei concediu per nuot.

21 da fevrer 1892
Concludiu da metter si negina taxa sin la crappa scalegl per ils vischins da vischnaunca che vulan per agen diever.

26 da december 1893
Miradur Candinas da Surrein-Sumvitg damonda lubientscha la vischnaunca da far ora crappa scalegl egl uaul da Nual. La vischnaunca concluda quasi unitamein d'accordar via quella crappa al sura Candinas e surlai alla suprastonza da vegnir perina ariguard cundiziuns e prezi.

12 da matg 1895
5. Il contractar vi la crappa scalegl a Nual e Calmut ei surschau alla suprastonza.

2 d'october 1897
Ha la ludeivla vischnaunca conclusivamein schenghegiau alla venerabla claustra da Mustér la taxa da vischnaunca per 75 - 80 crappa scalegl che dueien vegnir applicada vid ils altars dalla nova baselgia da Nossadunna.

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia-back-05.jpg