Ord la historia
„D'instruir ina u duas gadas per jamna e zuar la sera duront igl unviern el cant per la baselgia." Quella remarca el contract da lavur digl emprem scolast annual a Sedrun, Placi Antoni Bisquolm da Sumvitg, datescha digl onn 1849. Igl ei gl'emprem fastitg d'in cant baselgia a Sedrun, insumma en Tujetsch.
Indecis definitivs d'in chor ein buca eruibels e la tgira dil cant sacral per propi en fuorma d'in chor ei buca evidenta. Bein ha ei num che scolasts, mo oravontut ils spirituals, pil pli ils caplons, hagien tgirau il cant sacral. Igl onn 1869 seformescha in Chor viril a Sedrun sut la bitgetta da sur Gion Antoni Casanova da Vrin. Ils cantadurs dil cant baselgia e cant profan serecrutavan d'omisdus chors, ton che omisdus profitavan dalla cultivaziun dallas vuschs. Ils onns 1870 promova sur Giachen Antoni Augustin oravontut il choral en baselgia. Aschia vegn segidau viceversa, ton ch'ils dirigents dil chor viril ein per gronda part, sper ils caplons, era responsabels pil cant baselgia.
La fin dils 1940 ha il Chor viril difficultads cul diember da cantadurs, ton ch'el sesligia l'entschatta dils onns 1950. Vinavon resta il Chor baselgia Sedrun. Quel formava tochen lu negina uniun, vegneva tgamunaus ed empalaus dapi decennis dils dirigents e spirituals. Els fagevan tutta lavur organisatorica.
Anno 1951 ei vegniu giavischau da formar ina uniun cun statutas e suprastonza. Il chor, sco el exista oz, vegn fundaus ils 2 d'avrel 1951 e quei cugl intent primar: „... ei il cant ecclesiastic per embellir il survetsch divin e dar laud e honur a Diu e Nossadunna ed ils sogns en baselgia ed en processiuns." Il pensum dil chor baselgia ei lezs onns ualti vasts, aschia ch'il Chor mischedau da Sedrun surpren ina part dil cant sacral, ch'el pratichescha dapi sia fundaziun igl onn 1914. Quei funcziunescha tenor tradiziun tochen viaden els onns 1990.
Il pensum primar ei aunc oz il medem e quei cun accents specials sin las fiastas da Nadal, Pastgas e la perdanonza da s.Vigeli. Sper la tgira dil cant sacral, cun in grond repertuari da messas, vegn era il cant profan tgiraus mudestamein. Il diember d'exercezis cumpeglia oz entuorn 30 e las producziuns en baselgia varieschan entuorn 10 gadas. Meinsvart embellescha il chor era in concert da Nadal ensemen cun in auter chor.
Il chor separticipescha all'emprema fiasta da cant dall'Uniun ceciliana Cadi igl onn 1934. Ei suondan las fiastas cecilianas 1939 a Rabius, 1954 a Mustér, 1963 a Danis, lu 1986 a Rabius e 1990 a Danis/Tavanasa. Igl onn 1995 surpren il chor l'organisaziun dalla fiasta ceciliana ella baselgia parochiala da s.Vigeli a Sedrun. Vinavon separticipescha il chor allas fiastas cecilianas: 1999 a Trun, 2004 a Sumvitg e 2008 a Mustér.

AC0480
1995, da seniester a dretg; davostier: Marcus Munsch, Pius Cavegn e Mario Hitz; secunda retscha (sin peis) Tarcisi Hendry (dirigent), Simon Cavegn, Maurus Cavegn, Stanis Berther, Testi Monn, Fidel Hendry, Bernard Degonda, Ignazi Soliva, Norbert Vinzens (vicedirigent) e Dumeni Maissen; sesend: Vendelin Monn, Marcel Soliva, Isidor Monn, Gion Cavegn, Luis Curschellas, Tumaisch Aluis Huonder, Baseli Huonder e Tumaisch Curschellas; davontier: Ambrosi Solér, Guido Monn, Michel Loretz, Alfons Demund, Isidor Loretz, Guido Mathiuet e Rest Flurin Gamboni.

Dirigents:

sur Giachen Antoni Fetz, Sedrun/Domat  1922-1947
Toni Hendry, Sedrun 1947-1962
Alfons Schmet, Sedrun 1963-1978
Tarcisi Hendry, Sedrun 1979-1999
Beni Hendry, Sedrun 1999-2011
Gieri Spescha, Sedrun/Vella        2011-2015
Claudio Simonet, Curaglia

           2015 -       

Actualmein:
President: Marcel Soliva, Sedrun
Dirigent ed organist: Claudio Simonet, Curaglia
Commembers: 34 (onn da cant 2015/16)
Onn da fundaziun: 1849/1951

Documents
Emprema fiasta ceciliana a Muster, 1934, rapport dils derschaders
Secunda fiasta ceciliana a Rabius, 1939, rapport dils derschaders
Producziun alla fiasta da giubileum 75 onns Chor mischedau Sedrun, igl onn 1989.
mp4Chor viril baselgia Sedrun

O notg glischonta Chor Baselgia Sedrun/Tujetsch Dirigent: Gieri Spescha; www.gloria.tv

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia-back-03.jpg