40Chor mischedau Sedrun
(El cudisch da Tujetsch, cumparius 1987.) Norbert Vinzens ha surpriu la direcziun dil chor mischedau che conta mo ual in per gadas ad onn en baselgia. Igl engaschament per propi ei profans. Il chor mischedau seposta meinsvart ella publicitad e dat concerts, concerts da num che muossan ora ch'ins hagi mulau las vuschs tocca osumsum. Ed igl ei tuttavia buca giud via da dir ch'ins seigi ius in bufatg tschancun vinavon. Era duront ils fortis pon ins seretener ed emprova d'impedir enzatgei.
Ils vischins da Tujetsch e quels d'autrora laudan las bialas vuschs ed enzatgi po buca spitgar entochen l'autra producziun. Cun ses curontanov commembers ei il chor mischedau ualti pulpius ed aschia. (Vic Hendry)

Il Chor mischedau Sedrun ei vegnius fundaus igl onn 1914. La cronica redegida da Tarcisi Hendry relata suandontamein davart la fundaziun:Unbenannt-Scannen-03
El decuors digl onn 1914 ein entgins vischins da Sedrun serimnai e tschintschau sur dalla fundaziun d'in chor mischedau. Damai ch'ins leva fundar in chor cun giuvnas ein carteivel era quellas stadas davontier e fatg valer. Da lezs onns existevan mo a Sedrun gia dus chors: il Chor viril Sedrun, fundaus igl onn 1869 ed il Chor viril baselgia Sedrun. Buca emblidar lein la Societad da musica Sedrun ch'ei vegnida fundada igl onn 1875. Tgi ein denton quels piuniers e piunieras per la fundaziun d'in chor mischedau stai? Las scartiras, notizias e persunas che savessen raquintar e dar perdetga mauncan. Carteivel ein Gion Antoni Monn, Gion Felici Monn, ils frars Soliva da mulin, scolast Bistgaun Bundi, scolast Paul Livers, Breil, scolast secundar Hans Giachen Decurtins ed il plevon sur Engler stai ils iniziants e fundaturs dil chor. Gion Antoni Monn, bostger ha surpriu la direcziun, in um senza scolaziun musicala, denton dotaus cun talent musical ed ina biala vusch.
Ti sas persequintar la cuntinuaziun dalla historia cul document aschuntau:pdfCronica 75 onns Chor mischedau Sedrun

Igl onn 2014, sa il chor festivar il 100avel.
Norbert Berther, Zarcuns, ha fatg l'empunida tochen al 100avel.
El cuntinuescha suandontamein:
Suenter il giubileum da 75 onns va la lavur da cant vinavon. Norbert Vinzens, gia 20 onns dirigent, stat vinavon a disposiziun en quella funcziun. Sut sia direczun ei il Chor mischedau Sedrun daventaus in dils megliers chors da quella categoria ella Surselva. Aschia ha el astgau ughegiar da prender part per l'emprema gada d'ina fiasta da cant federala. Quella ha giu liug ils 24-26 da matg 1989 a Lucerna. Cun il predicat „Fetg bien" ein ils Tuatschins returnai dalla fiasta. Cun arbagias dad aur (Excellent) ei era il Chor d'affons Sedrun sut la direcziun da Miriam Berther vegnius undraus a quella caschun. Igl onn 1991 abdichescha Norbert Vinzens sco dirigent. La suprastonza ha encuretg senza success in successur e la finala ha Norbert puspei surpriu il chor tochen 1993. En quels 24 onns da dirigent ha el mussau 160 canzuns novas e 15 per part gia enconuschentas. Ils 14 da zercladur 1994 vegn el nominaus dirigent d'honur a caschun d'in concert dil Chor mischedau Sedrun.
Suenter l'abdicaziun da Norbert Vinzens ha il chor ditg encuretg in successur. La finala surpren scolast Tarcisi Hendry la bitgetta dil chor. Davart sia elecziun stat ei el protocol: „Tuts ein beai e cuntents!". Tarcisi era gia dirigent dil Chor baselgia Sedrun ed haveva aschia ina gronda experienza da menar in chor.
Dapli mira en: pdfCronica 100 onns Chor mischedau Sedrun

Dirigents
1914-1922 Gion Antoni Monn
1922-1948 sur Giachen Antoni Fetz
1948-1955 Toni Hendry
1956-1959 Vic Hendry
1959-1969 Alfons Schmet
1969-1993 Norbert Vinzens
1993-2000 Tarcisi Hendry
2000-2001 Albert Spescha
2003-2005 Reka Domjan
2005-2008 Jacinta Jacomet
2008-2012 Maria Regina Wilms
2012-2015 Gieri Spescha
Dapi  2015 Claudio Simonet

Communicau en La Quotidiana dils 18 d'october 2017

Dil «Chor mi­sche­dau Se­drun» tier «Las vuschs dil Rein»
(cp) Dacuort ha il Chor mischedau Sedrun salvau sia radunonza generala. Quella ha giu liug a Mustér e cantaduras e cantadurs han decidiu da far ina midada dil num dil chor sin «Las vuschs dil Rein». Gia dapi enzacons onns han pliras cantaduras e cantadurs da Mustér e Medel frequentau las emprovas dil Chor mischedau Sedrun. En vesta a quei fatg han ins ussa priu la decisiun d’adattar il num dil chor alla situaziun. Sco chor sut il niev num «Las vuschs dil Rein» san las finamiras dil chor vegnir slargadas e cumpletadas.
Per l’ina vul il chor sepresentar en las treis vischnauncas ulivamein ed era enramar en quellas las occurrenzas localas, per l’autra vul il chor slargar l’activitad concertanta cun organisar concerts communabels cun auters chors e formaziuns sin la ruta dil Rein. Ordlunder san nescher buns contacts suls cunfins ora e forsa schizun carmalar enqual hosp da visitar ni passentar vacanzas el contuorn dalla tgina dil Rein. El center stat secapescha vinavon la tgira dalla canzun romontscha. Sche quella sa survir alla promoziun dalla cultura indigena ed era aunc vegnir purtada sur nos cunfins sche satisfa quei dil tuttafatg allas intenziuns dil chor.
Da s. Stiafen sepresenta il chor l’emprema gada sut il niev num «Las vuschs dil Rein» e quei cun il concert tradiziunal da Nadal en baselgia s. Vigeli a Sedrun. Denton vegn ins era ad intervegnir nua ch’il concert primavaun ed il concert atunil 2018 vegnan ad haver liug.
Novas cantaduras e novs cantadurs dallas treis vischnauncas Sedrun, Mustér e Medel ein da tut temps cordialmein beinvegni. Las emprovas han liug mintgamai gliendisdis sera allas 20.00 en casa da scola Sedrun.



CMSaLausanna
                                             Il chor a Losanna igl onn 1926

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia-back-03.jpg