Aunghel

Igl aunghel dalla paisch - Drama en 5 acts da revendissim pader Maurus Carnot; ils 13, 20 e 27 da schaner 1929. - Producziuns dalla Societad da musica Sedrun e Chor viril Sedrun. - La Cumpignia da mats.

Aunghel

Teater a Sedrun

(Corr.) Dumengia vargada ha la ludeivla Cumpignia da mats da Tujetsch representau il stupent drama: “Igl aunghel dalla pasch”. Quell’aura favoreivla – lu naturalmein la regurdientscha dil “Venantius” digl onn vargau – ha clamau neutier entiras roschadas glieud. Tgi che ha uonn puspei viu las prestaziuns da nos giuvens, ha segiramein buca stuiu s’enriclar. Scadin plaid, gie schizun scadin gest, purtava il sigil ch’in regissur cun maun meisteril hagi luvrau cheu. Signur deputau Gion Felici Monn, zun capavel regissur, ei sez translatur dil drama. El ha cungiu quel cun spir tun popular che cuora, rocla sco l’aua dil Rein ed ei in deletg d’udir. Era ils costums dalla firma Kaiser a Basel han buca attribuiu pauc tier la producziun dramatica. Cant e musica han decorau il teater cun ils megliers fretgs da lur lavur.
Nus savein puspei esser ferm perschuadi, ch’il teater a Sedrun hagi anflau tier in e scadin cumpleina cuntentientscha. Speronza che s. Giachen e s. Antoni, quei humiliteivel, astgien puspei selegrar d’in pulit biemaun.

Teater a Sedrun
Igl aunghel dalla paisch” ha en sia tiarza producziun la dumengia vargada fulenau la sala e cuntentau cumpleinamein buca mo ils egls – egls che tarlischan en larmas ein perdetgas zun valentas – mobein cuntentau era las ureglias e las olmas. Duront varga treis uras ei l’attenziun carschida ed in crescher tochen sil davos solemn mument, nua che Ugone, igl aunghel dalla paisch, sper la porta dil marcau, ha sacrificau tut, per schar anavos a sia patria il custeivel scazi: la paisch! Danunder vegn quei stupent success? Senza dubi inrteressescha l’idea dil drama sez, essend ch’ei dat bein strusch ina vallada e cuntrada, strusch in uclaun e carstgaun, nua che la paisch po flurir senza urezis e sacrifezis. Denton havess quella idea buca pudiu victorisar silla tribuna, la quala representa il mund, sche buca las persunas havessen dau tala vigur e veta als plaids, ch’ins carteva fermamein: nus vivin el marcau d’Urbino avon tschentaners denter aunghels dil Segner ed «aunghels» dil prenci dalla stgiradetgna. Ina tala producziun, nua che mintga persuna e fatscha, mintga egliada, gie mintga plaid e mintga det fa cumpleinamein siu duer, meretta in laud general, il qual fuss buca pusseivels, sche buca mintga persuna havess meritau in laud special. Ei fa mal al scribent da questas lingias da buca astgar occupar ina entira pagina da nossa «Romontscha» cun descriver scenas schi vivas, ch’ellas restan aunc ditg avon nos egls ed en nossa memoria. Tut ses acturs sut lur beinenconuschenta direcziun han francau lur renum. Denton han els, ensemen culs cantadurs e musicants, aunc in pli niebel intent: porscher ad els sezs ed al pievel in divertiment, che vegn alzaus e nobilisaus tras in nunponderabel gudogn pell’olma, la quala bragia ed endira fom e seit bein enqual ga el pauper pèz dil carstgaun. Cordial engraziament ed in semegliont stupent success per la davosa producziun!
M.

Teater a Sedrun
Malgrad aura disfavoreivla, neblauna e ferdaglia, ha “Igl aunghel dalla paisch” giu dumengia vargada puspei gronda attracziun. Tgei leis dapli ch’ina sala fulenada cun roschadas da glieud da lunsch e damaneivel? – La Gasetta Romontscha ha gia in per gadas rapportau cordial engraziament e meriteivel laud a questa producziun dramatica. Era quella gada ha in e scadin actur giu admirabel success en talis e qualis. La bein gartegiada viarva romontscha che tuna schi natural e popular ha danovamein svegliau grond interess e smarvegl tras a tras, entochen la fin, nua che l’idea idealica dil drama sco tal sesclarescha e la sontga mira d’in niebel giuven prenci va en vigur.
Sin repetiu giavisch vegn “Igl aunghel dalla paisch” representaus per la tschunavla ga. Cant e musica sut l’enconuschenta capavla direcziun decoreschan puspei cun excellentas producziuns il teater. Nus essan perschuadi ch’in e scadin anfla per enzacontas uras ruaus en tuts quitaus quotidians. Tgi che vul pia guder dumengia proxima in engrazieivel miezdi, quel serendi a Sedrun. El fa cheutras in regal a s.Giachen e s.Antoni e quels emblidan segir buca quei. La finfinala ei la bun’ovra il meglier amitg dil carstgaun. Sulet quella cumpogna nus entochen avon il divin derschader e plaida leu en nossa favur.

Aunghel 1

 

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

historia-back-02.jpg