Il legiunar da Mittwald a Sedrun
Da s. Stiafen-sera havein nus giu caschun da saver mirar quei bi toc e saviu sperschuader che quel vegn veramein daus exemplaricamein.
Segir havessen ins buca saviu eleger in meglier toc, che gest in tal per il temps dad oz. Gia ella emprema scena vesan ins co il beinstont pur Amaher cun sia dunna e feglia sesentan cuntents sin lur bein puril, e perquei spetgan aunc in secund fumegl sin siu grond bein e tgi vegn bein quel ad esser? Inserat LegiunariIns vesa che las vias dil Segner ein buca las nossas, e perquei vegn il pauper e bandischau affon da negin anavos ord la legiun jastra suenter 23 onns sgomiaus da tuts. Cun agid dil bien augsegner e signur Amaher vegn quei giuven cul num Wilhelm a saver entscheiver ussa ina nova veta, mo quei ei per el fetg grev.
Nus savein cheu buca entrar el cuntegn dils singuls acts, ch'igl auditur persequitescha cun gronda attenziun e tensiun. Perquei fagein nus in grond cumpliment ad acturas ed acturs sco era al regissur per lur gronda e bein gartegiada lavur. In special cumpliment al legiunari Wilhelm che dat tut aparti bein sia rolla.
Ti cara lectura e lectur, che legias forsa questas munglusas lingias, neu a Sedrun ed emposta in plaz per las davosas producziuns che vegnan aunc dadas. — Ti vegnas buca a setrumpar. Igl ei ina producziun instructiva per mintgin da nus. Als da Sedrun giavischein da tut cor per mintga producziun ina sala fullanada per renconuschientscha dil prestau sin nossas tribunas aunc romnotschas.
In aspectatur

Sedrun
Il legiunari da Mittwald
(Corr.) La medema sera da s. Stiafen essan nus stai perdetga dil «Legiunari da Mittwald", menaus si a Sedrun. Cunquei ch'il giavisch da sauna critica» ei vegnius exprimius, vulessen era nus empruar da dir nies meini.
Cun plascher savein nus constatar che quei tema ha era da dir enzatgei en nos dis, sco il preziau aspectatur haveva gia menziunau en la Gasetta Romontscha.
Denton essan nus meins cuntents cun la translaziun. Il translatar in toc tudestg en in bi lungatg romontsch, gliez drova tgau e temps! Nus cartein strusch ch'enzatgi havess plascher, sch’in plevon schess «dad ir a volver la dunna»! Talas ed autras expressiuns drovan ins gnanc per las gassas e streglias.
Quei ch’appartegn ils giugadurs havessan nus da dar in bien cussegl al regissur. Forsa ch’in ni l'auter dils giugadurs havess giugau meglier in autra rolla che ual la sia. Per exempel seglia in vegl da siatont’onns buca sco in giuvenot da schotg onns dad esch en!
En stiva ha mintgin tonta creanza ch’el dat ina sutga al sur plevon!
Tgei aspectatur sesenta buca disturbaus sch’el vesa co tuts giugadurs ein premurai da «suflar en" ton sco el po a quel che sa buc ordador sia rolla?  
sch'il tschiel ei violets?
sch'in sault modern tuna ord igl aultplidader en in mument da ponderaziun?
Preziai lecturs, bugen sperein nus che Vus hagies sez saviu seperschuader dallas sura prestaziuns e saveis aschia giudicar tgi ha giu raschun, igl aspectatur da tschei di ni
in'aspectatura.

Sedrun: Il legiunari de Mittwald
Risposta alla honesta aspectatura e perdetga dil «Legiunari da Mittwald».
Jeu hai per disa, sch’jeu vegnel attaccaus dad in animal malvugliu e cun vezi, da dar cun in bengel denter las cornas giuaden, epi sei bien. Alla virtusa aspectatura dil Legiunari da Mittwald viel esser pli raschuneivels ed era dar denter giuaden, denton mo levet cun la plema. Forsa cuntenta quei ella, sch’ella ei buca vegnida cuntentada la sera da s. Stiafen.
Probabel eis ella en sia sontgadad aunc vegnida disturbada dad in aspectatur ni l’auter e lu san ins capir. Il plaid volver drovel ual per la aspectatura e volvel, tochen che jeu vesel sche ella ha veramein davostier in «a»? Quei saiel aunc oz buca constatar. Saiel denton constatar che tala aspectatura ei buca vegnida a teater per mirar teater, che tala aspectatura ha insumma pauca ni negina capientscha el fatg da teater, e fuss forsa gnanc el stan da giugar sin la tribuna la pli pintga, sempla rolla, forsa gnanc ina rolla meta, bein denton capavla da giugar davos las culissas ina tresta e schampra rolla.
Sch’il regissur ha el teater buca schau porscher la sutga al sur plevon, ei quei aunc iu a prau. E sch’jeu havess saviu, che tala aspectatura vegness lezza sera a teater, havessel era buca schau porscher la sutga ad ina tala, ed ella havess stuiu secuntentar sco il sur plevon e star sin peis. E sch’in giugadur ni l’auter sto bein enqualga vegnir suflaus en da ses congiugadurs, tgi ha lu bein suflau en alla nobla aspectatura sia correspondenza? ? ?
Consista il bi e bien lungatg romontsch ord la viarva e tensiun che l’aspectatura ha duvrau, lu ston ins buca smarvegliar, sch’ins scriva oz dad in lungatg romontsch moribund.
Jeu enquerel ni renum ni undrientschas, sulet sededicaus ad in survetsch per il concarstgaun.
A mi fa ei plascher che las sis societads reunidas da Tujetsch anflan en la sura aspectatura ina persuna adattada e qualificada, che vegn probahel els proxims onns a presentar sin la tribuna romontscha, dramas classics e honests, e producir inagada senza menda el bi e bien lungatg romontsch.
Il regissur dil Legiunari da Mittwald
Placi Deragisch

Teater a Sedrun
La recensiun dil teater «Il legiunari da Mittwald» entras ina aspectatura e la risposta dil regissur leventa viva discussiun. Nus vein retschiert pliras correspondenzas che sustegnan il meini dalla «aspectatura». Ins perstgisi denton, sche nus tralaschein ulteriuras publicaziuns da quellas varts ed evitein ina ulteriura polemica.

 

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

27-1965.jpg