Ils frars Taverna 1948

1948 Frars Taverna

Teater a Sedrun
(Correspondenza) Ir a teater, mirar teater, far teater. Quels plaids audan ins oz per mintga via e streglia. Gie, ir a teater! O sche jeu dumandass il pievel sursilvan il meini, 90 % sche buca dapli fussen persuenter. Gie, ir a teater dueigien ins! Mo tgei teater dueigien ins mirar? Plai forsa a ti leu, nua ch’ils sabels vegnan smanatschai, revolvers smenai e buis cargadas naven dall’entschattta tochen alla fin. Leu nua che smaledicziuns e giavels roclan sco ina bova. Jeu creiel strusch. Tut cun mied e mesira. Denton, vas ti pli bugen leu a teater nua che ti sas che acturs e acturas da num e pum passan sin la tribuna? Franc e segir! O lu senezegia d’enzacontas bialas uras e va a teater a Sedrun, va e mira il toc: „Ils frars Taverna„.
Cheu vesas ti buca stilets, revolvers e buis, na, in schabetg ord la veta purila sepresenta avon tes egls. Sa ei buca dar en nossas famiglias material per tals tocs. Va e mira e ti smarveglias. Denton sco gia detg, cheu passan sin tribuna acturs ed acturas da num. Sas Ti forsa seregurdar ch’ils buns Tujetschins han inagada buca menau si siu toc cun tutta cuntentientscha per ils aspectaturs? Na, jeu crei buc! Al signur regissur Toni Hendry nies cumpliment per la biala translaziun e per sia beingartiada lavur. In special cumpliment a Telli e bab Taverna. Giavischein da cor per las proximas producziuns ina sala fulanada.
In aspectatur