La matta giul Schuob 1957

1957 MattaTeater a Sedrun
(Corr.) Pastgas annunzia legria e veta nova. La primavera ei a strada e dedesta flurs e verdins. Il cor human vul sesarver a quella fluriziun e bellezia.
Onn per onn procureschan nossas uniuns ina u l’autra distracziun, che vul gidar a cultivar quella legria. Aschia ha era nies Chor mischedau Sedrun ughegiau uonn d’ascender la tribuna. Gliendisdis Pastgas ha quel envidau nus a sia cumedia populara »La matta romontscha giul Schuob«. Ei setracta d’in giug aunc pauc enconuschent, che sur dr. Carli Fry da pia memoria ha giu arranschau per nossas relaziuns tenor in original tudestg. Igl ei in sempel toc, construius en claras lingias e screts en biala viarva. Igl ei era in toc instructiv e serius, che muenta veramein ils cors dils aspectaturs. Cun smarvegl havein nus saviu constatar, che quella cumedia, cun spirontamein rollas da femnas, anfla gronda attracziun. Il regissur Felici Monn ha saviu raccoltar bialas arbagias per sias biaras stentas. Las numerusas giugaduras, grondas e pintgas han gie dau il toc cun cor e perschuasiun. Igl ei vegniu prestau lavur seriusa e nus gratulein sinceramein per tonta breigia e sacrificontadad! Il chor mischedau ha introduciu quella cumedia cun treis emperneivlas canzuns plein veta e vigur. Sut la direcziun dil niev dirigent scolast secundar Ludivic Hendry ha quei chor cantau ch’igl ei stau in ver deletg da tedlar. Quellas bialas vuschs sonoras han resunau aschi frestgamein ed aschi natural sco il cant da nos utschals el temps da primavera. Nus giavischein pia cumplein success era tier las proximas producziuns.
D.