Tujetsch
(Corr.) Per ordinari stava nossa cuntrada da quei temps en nevada; mo ussa ei gl'unviern era vegnius pli moderns. Cunzun uonn ha el fatg empau da fin, schau sgular e saltar las legras scrottas da neiv mo sils cuolms pli da vaglia, ulivond tschenghels e muletgs, ed alla sola dalla vallada ha el dau mo in sularada. Per quella raschun e per consequenza dallas draccadas digl atun schema e plira la natira en schelira. Las auas ein tschessadas, tscheu e leu caladas. Il giuven Rein ramura mo fleivel sut siu manti ch'enzuglia e cuviera aschizun la crappa freida dira. El gnanc auda pli il clom lamentond dils avdonts fomai ord la selva, il sgregn dil quac e dalla sgagia. Bein ha il sulegl scurlau oz als pegns barbus la freida tgambrida, mo ses radis ein pallids e pauc scaldonts. Memia baul sevolva el davos ils cuoms e va da rendiu. Nus vein pli gronda fidonza sin la pegna bein temprada cun manedels, cuschas e pledra. - In bratsch neiv fuss d'engrau per in e scadin. Denton direger ils vents e regetar las auras schai buc els mauns dil carstgaun. Malgrad la pauca neiv flurescha il sport a Tujetsch. Ils dus hotels a Sedrun ein aunc adina frequentai da 60 jasters da pliras naziuns. Nus beneventein quei svilup per il beinstar dils hotels da nos conburgheis. Far denton ord Sedrun sigl avegtnir in grondius liug da cura, ei, ton sco nus pudein veser, buc il giavisch dil pievel tuatschin. In tal progress turbelass nossa buna aria alpina, mettess en scalgias la sempladad e periclitass religiun e morala, il fundament dall'existenza d'in pievel. Vegli il Suprem leusi direger nies avegnir! 
La ludeivla cumpignia da mats arranscha puspei in teater, denton buca ton per schar viver il tscheiver, sco per pli sublims intents. Ins ha cun gronda pazienzia e cun ver spert da sacrifitontadad perparau primo in toc da tempra humoristica: "Caspar Larifari, sco sculptur", versiun romontscha da scolast Gieri Vincenz e plinavon "La mort dil bandit" drama en treis acts fatgs da sur dr. Carli Fry, tenor il fil d'in drama franzos da Giusep Orget.  Il trest eveniment daventa igl onn 1445 silla via dil Lucmagn, denter ils hospezis da Sontga Maria e Casatscha, la sera suenter la fiasta da s. Placi. La quintessenza da quei drama cun caracter religius e scenas per part zun commuentontas, plein impressiun ei, ch'il spiritual dat tschein e melli ga la veta, avon che violar il sogn sigil sacramental.
Las ludeivlas societads da cant e musica vegnan era a porscher lur pusseivel per empelir la representaziun dil sura. Nus sperein bugen e recumandein, ch'enqual amitg da nossa biala Val Tujetsch ed auters amitgs dalla giuventetgna arrivein dumengia proxima a Sedrun.
B.P.

Tren special per Sedrun
Cun caschun dalla producziun teatrala a Sedrun cursescha dumengia proxima in tren special da Mustér a Sedrun. Partenza da Mustér allas 12, Segnas 12.10, Mumpe Tujetsch 12.15, arriva a Sedrun allas 12.30. Per il retuorn san ins sesurvir dil tren regular.


Coorespondenza da Tujetsch

Mantenet in bi usit ha la Cumpignia da mats da Tujetsch era uonn puspei vuliu delectar nies pievel cun in teater. Il bien renum acquistaus ils davos onns ha franc buca pauc contribuiu tier quella resoluziun. Il procurar per in adattau drama ei denton buca ina leva missiun. Munglass ei gie esser enzatgei niev ed enzatgei da coc, sco ei descha per ina cumpignia da mats. Las, a proporziun numerusas uniuns dramatricas romontschas, drovan spert suenter ils paucs novs dramas ni translaziuns da tals ed il repeter il medem toc en pign interval riscus.
Cheu ha ei num buntganar ils scribents romontschs, ch’els porschien agid a nossas societads en quei risguard. E cheu duess mo il meglier esser bien avunda.
Sur dr. Carli Fry cun sia versada plema ha puspei enrihiu nossa littertura dramatica cun in bi drama. Ord il toc franzos ha il poet scaffiu in drama original po ins dir, tschentaus sin nies tschespet e cun tipics nums romontschs. Bien engraziament. Dumengia vargada ha "La mort dil bandit" passau cun bien success per l’emprema gada la tribuna romontscha. Cun buna raschun astgav’ins spetgar digl exprimentau instructer, ch’el anfli las adattadas persunas per scadin post e che mintga rolla survegni la dretga tempra. Quei dat lavur e drova pazienzia cunzun tier ils novizs. Perquei auda al premurau regissur in grond engraziament, ch’el ha sper siu uffeci da president communal era uonn puspei sacrificau temps e breigias per mussar cumedia. Ord il drama mo in per maletgs.

Cun tgei curascha ughegia il giuven Rico da, malgrad tuttas smanatschas dils bandits, d’ademplir il davos giavisch dil moribund. Il “Spada lada”, il cap dalla banda, il “Sfracca tut” e ses socis ein bandits che fan tut sterment.
E lu il pader, tgei contrast! Cun saung freid mira el las buis drizzadas sin el. El duei rumper il sigil dalla confessiun. Mo sia stateivaldad sforza ils bandits da confessar, ch’els seigien nuot en confrunt cun la “forza” da quei vegl spiritual
Il cant dils aunghels, dils mattets ed il “miserere” dils bandits per lur cumpogn moribund, tut fa sia imperssiun.

Suonda lu aunc in toc plein humor, che scatscha per ina bun’uriala tuts quitaus e fastedis quotidians, aschia ch’era igl amatur d’in rir da cor vegn tier il siu. Era cheu ein las rollas en buns mauns, specialmein la tripelallianza ha in grond success cun sia interpresa. Al niev regissur era in cumpliment e bien success vinavon.
Cun tut priu porschan las producziuns da teater a Sedrun, enramada d’in bi cant dil Chor viril Sedrun e producziuns dalla Musica Sedrun, zacontas uras d’emperneivla recreaziun. Mussaders ed acturs merettan sala fulanada per las suandontas producziuns.
Lein ver speronza che s. Pieder arvi puspei ora in tec las finiastras, che bein biars seprofiteschien dalla caschun per far ina viseta a nossa biala val.
.z.

Tren special per Sedrun
Per dar caschun da frequentar il teater a Sedrun vegn ei, en cass da bialaura, dau in tren special da Mustér a Sedrun. Partenza da Mustér allas 12, Segnas 12.10, Mumpe Tujetsch 12.15, arriva a Sedrun allas 12.30. Ins sa turnar la sera cul tren regular.

 

 

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

04-1967.jpg