2003 Gironnas

Preziai amitgs, preziadas amitgas dil teater
Suenter il grond success digl onn vargau culla «Pensiun Schöller» eis ei buca stau sempel d’anflar in toc che stat a per.
Culla cumedia en treis acts da Willy Webels e Carl Siber «Nies bien Gironnas», cartein nus dad haver anflau in successur meriteivel.
Nies bien Gironnas
Signur Gironnas Klusemann ei il possessur dad ina agentura da maridaglias. Malgrad ses sissont’onns eis el in um spir temprament ed energia. Ensemen cun ses dus amitgs, Emil Fink ed Adam Lipp, festivescha el ina filistucca suenter l’autra. Els ein hosps regulars ella «Latiarna cotschna», in local da notg cun in num dubius. Secapescha astga la dunna Regina Klusemann endriescher nuot dallas aventuras nocturnas da siu um. A casa ed avon sia clientella gioga el il bien Gironnas, aschia in bienatsch che sa far mal a negin. Enquera el ensemen cun ses dus mitgs in’aventura, sesurvescha el dalla stgisa ch’in da ses megliers amitgs seigi nunspitgadamein morts. Mo la dunna Klusemann ei buc aschi tuppa. Gia daditg ha ella ferdau la puorla.
Cura ch’ella incumbensescha schizun il renomau dedectiv Oscar Jung d’observar siu um, vegn ei ualti hanau per nies bien Gironnas.
Nus sperein ch’in u l’auter datum cunvegni a Vus per assisster a nossa cumedia.
La cumpignia da teater Rueras, ina pintga gruppa al pei dil Pass Alpsu, selegra fetg sin Vossa viseta.
Tuatschina

"Emprova seriusa" a Tujetsch
La Cumpignia da teater Rueras finescha la sesiun da teater
da SIBYLLE PFIFFNER
Salas fullanadas han animau la Cumpignia da teater Rueras da cuntinuar cun ina cumedia. Da Pastgas presentan dudisch acturs la cumedia «Nies bien Gironnas». «Ju less aun ignéda la scena cu Gironnas vegn dad ésch ain», manegia il regissur Hubert Venzin da Rueras. Dapi biabein 25 onns s'engascha il Tuatschin per il teater. Per «Nies bien Gironnas», ina translaziun da Willy Webels e Carl Siber, ha la cumpignia da teater exercitau biabein treis meins e miez. Gliendisdis vargau han ils acturs presentau lur emprema «emprova seriusa» a Rueras, sco quei ch'il regissur numna l'emprova. La cumpignia da teater finescha la sesiun da teater cun ina cumedia divertenta ed interessanta.
Ina filistucca suenter l'autra
Per translatar la cumedia da treis acts ha Hubert Venzin investau biabein 80 uras. Cunquei ch'il regissur ha scret uonn per l'emprema gada il toc cul computer, ha el spargnau ina massa temps. «Il giugar teater haiel jeu artau dil bab. Fussel jeu aunc inagada vegn onns pli giuvens, visitass jeu la scola d'acturs a Berna», manegia il regissur che ha grond tschaffen che tontas persunas s'interesseschan per la Cumpignia da teater Rueras. Dils dudisch acturs han era persunas giuvnas anflau interess pil teater.
Sin la tribuna stretga dalla sala da Rueras giogan acturs dapli che dus decennis teater. Dapi plirs onns tschontschan ils acturs senza retenientschas tuatschin. Avon risdavan ils giugadurs sursilvan. Il regissur ei spanegiaus co il publicum accepta uonn la cumedia.
Gartegia la premiera, vegn il toc segiramein era ad haver ton success sco la cumedia «Pensiun Schöller» digl onn vargau ni autras cumedias. Mintg’onn legia il regissur rodund 100 tocs da teater avon che sedecider per in. Il Tuatschin manegia: «Grazia a mia experientscha cul teater haiel jeu survegniu in sentiment per tocs che savessen plascher al publicum. Lu risguardel jeu era ils interess dils acturs pil toc humoristic.» Hubert Venzin preferescha la cumedia classica.
Suenter las presentaziuns senta il regissur magari ina vitadad. «Jeu sundel satisfatgs suenter la sesiun da teater e tuttina sentel jeu magari vitadad en mei la primavera», manegia il regissur. Damai che la clamada purila daventa puspei pli activa da quei temps, ei Hubert occupaus e culs patratgs vid sia lavur.
"Nies bien Gironnas"
La cumedia en treis acts tracta il temps dad ier, oz ni forsa era damaun. Gironnas Klusemann (Richard Cavegn) posseda ina agentura da maridaglias. Malgrad ses sissonta onns eis el in um spir energia e temperament. Ensemen cun ses dus amitgs, Emil Fink (Mudest Venzin) ed Adam Lipp (Bruno Berther) fa el ina filistucca suenter l'autra. El local da notg «Latiarna cotschna» ein els hosps regulars.
Dunna Regina Klusemann (Imelda Monn) astga buc endriescher dallas aventuras nocturnas da siu um. Il bien Gironnas che gioga il bienatsch avon sia clientella enquera ensemen cun ses dus amitgs aventuras e sesurvescha lu dalla stgisa ch'in da ses megliers amitgs seigi morts nunspitgadamein. Dunna Klusmann freda la puorla ed incumbensescha schizun il dedectiv renomau, Oscar Jung (Primus Deragisch). Lez observa Gironnas tochen ch’ei vegn ualti hanau per il «bien schani».
Per las culissas dils treis acts ein tuts acturs segidai sin ina moda ni l’autra. Ils maletgs repicturescha il regissur, pia igl artist Hubert Venzin, mintg’onn da niev.
Suflettas en acziun
Duront la «emprova seriusa» ein era las suflettas en acziun. Schegie ch'ils acturs san lur text pli u meins ordadora, persequiteschan las duas suflettas davos igl umbrival la cumedia en treis acts. Duront igl exercezi serius crodan plaids sco «Steilalva» enstagl da «Latiarna cotschna». Ils acturs ein plein humor e tuttina giogan els fetg serius lur rollas. Sco aspectatur han ins buc inagada il sentiment ch'in actur ni l'auter s'identificheschi buca cun sia rolla. Survient, survienta, camerier, artista, vieua, administratur, feglia ed ils auters giugadurs giogan lur rollas sco sch’els havessen mai giugau in'autra.
«Nies bien Gironnas», ina cumedia en treis acts giugada dalla Cumpignia da teater Rueras ei segiramein ina enrihida el temps da Pastgas. Il toc spirtus e divertent fa bein a tgierp ed olma. Tgi che vul buca munchentar il toc humoristic viseta la cumedia a Rueras.

Producziuns da «Nies bien Gironnas» a Rueras:
Pastgas, ils 20 d‘avrel allas 20.00
venderdis, ils 29 d avrei allas 20.00 
dumengia, ils 27 d’avrel allas 20.00 
venderdis, ils 2 da matg allas 20.00 
sonda, ils 3 da matg allas 20.00
La Quotidiana

............  

 

 

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

06-1967.jpg