Teater a Sedrun en sala dalla scola las dumengias, ils 23 e 30 da schaner ed ils 2 e 6 da fevrer. - Sogn Willibald - Drama historic en 5 acts ord il 18avel tschentaner. - Denter ils acts producziuns da cant e musica. - La societad da mats Tujetsch

«Sogn Willibald a Sedrun»
(Corr.) En preschientscha d’in numerus publicum, dalunsch e datier, ha la ludeivla Cumpignia da mats Tujetsch purschiu la dumengia vargada enzacontas aschi emperneivlas uras, ch’ils giuvens dramatichers meretan cumpleinamein entginas lingias da renconuschientscha per lur stupentas prestaziuns. «Sogn Willibald» ei in drama, che corrispunda veramein al profund senn religius e moralic dil pievel tujetschin. L’elecziun da quel ei en quei grau dada e segirescha ordavon il necessari anim tier ils giugadurs, l’emprema cundiziun, sch’igl effect duei penetrar ils cors da tuts aspectaturs. Bein in e scadin ha applaudiu tier la fin sut l’impressiun, da haver raccoltau ina reha morala, che selai trer tgunschamein ord la representaziun. Tras l’entira acziun sepresenta d’ina vart la buontad sezza, che anfla reha pagaglia. Da l’autra vart vegn la schliatadad personificada en in grond contrast, che cloma sur dad ella il beinmeritau castitg. L’entira acziun porscha ualti bia variaziun e per part vivas scenas. Per buca prender igl interess als aspectaturs tiers las proximas producziuns, cunvegn ei da desister d’ina skizza dil drama.
Gest aschi generala ei stada la secunda impressiun, bandunond la sala teatrala da Sedrun. Ils giuvens mimichers han caracterisau senza excepziun lur rollas sin stupenta moda e la capavla direcziun ha pari tschentau mintga um en il dretg post. Quei ei stau ton pli grev, ch’ins ha sper entginas paucas forzas da vaglia habilitad stuiu trer tier tut giuvens, ch’ein aunc mai passai si publicamein. Mo gest la gronda part da quels ha dau sia caussa aschi natural, ch’els empermettan bia pigl avegnir. Perschuadius, che singuls giugadurs fussen meriteivels da vegnir menziunai specialmein, mo ch’els laghegian tuttavia buc suenter laud persunal, secuntenta il scribent da questas lingias da gratular a tuts participonts ed alla nunstunclenteivla direcziun tier lur cumplein success. 
Tut laud era a cantadurs e musicants, che han cumpleinamein empleniu ora stupent las pausas e purschiu ad amitgs dalla musica in dubel deletg. Bein tuts aspecturs, principalmein quels da pli lunsch, vegnan a haver exprimiu lur buna impressiun ad in ulteriur publicum, aschia ch’igl ei da spetgar, che biars diregian lur pass viers Sedrun tier ina dallas proximas producziuns. Ina schlitada en Tujetsch ei en sesez in grond divertiment per in che ha sentiment per la bellezia dalla natira, che quella biala vallada alpina porscha ussa en siu vestgiu d’unviern. E sch’in manegia, ch’in drama d’in sogn porschi stagn pauc per siu humor, anfla el abundonta recreaziun en legra cumpignia dils Tujetschins.
Da menziunar eis ei plinavon che la sala da teater ei vegnida renovada radicalmein e porscha ussa abundont plaz ad in numerus publicum. Las scenarias novas ein bein gartegiadas, ils costums veramein bials, dus facturs da gronda impurtonza, per segirar il dretg effect d’in drama. Cuort detg, la ludeivla Cumpignia da mats da Tujetsch sa porscher en tuts graus enzatgei da vaglia ed ei meriteivla da saver producir danovamein avon sala fulanada.
C.-

Sala da teater en casa da scola Sontget/Dulezi
Ils 15 da schaner 1911 rapport’il signur president communal alla ludeivla vischnaunca ch’ils giuvens mats fagessien bugen diever dil tschaler dalla casa da scola a Sedrun per far teater etc. e damondan dalla ludeivla vischnaunca la lubientscha dad arranschar en il tschaler per tal intent.
Suenter haver discussionau quella caussa, concluda la vischnaunca da ranschar en il tschaler scola per diever dalla ludeivla vischnaunca e dils mats, per tener radunonzas da vischnauncas etc.

 

 

Historia da Tujetsch sa era fascinar Tei!

0270
CuviartaAmerica

Historia dall’emigraziun tuatschina ell’America: Na, na, anora mass ju per de biè bétga plé. - cumpariu 2011 pdfAmerica

mp3AmericaTujetschL'emigraziun ell'America", emissiun d'Esther Berther ella Marella dil RR. Emissiun da Radioscola 1966 sur dall'emigraziun americana dad A.Maissen
Giuv Film
1816/17 - igl onn senza sulegl ed igl onn dalla fom. Mira: A la sumbriva dal tambora

Contact

Tarcisi Hendry
Via Dentervitgs 3
7188 Sedrun
Diese E-Mail-Adresse ist vor Spambots geschützt! Zur Anzeige muss JavaScript eingeschaltet sein!

04-1967.jpg