Venantius 1955

1955 Venantius

Venantius a Sedrun
(Corr.) Duas gadas ha la Societad da musica Sedrun giu produciu la tragedia da Venantius, in dils megliers dramas da pader Maurus Carnot. La fuola da glieud attesta il meglier igl interess ed il plascher che nies pievel romontsch ha per tocs da tala natira. La gronda variaziun e tensiun lai strusch in mument temps da respirar cumadeivlamein e la viarva cula sco curals tarlischonts ord ina fontauna alpina. Sur dr. Gion Cahannes ha daveras anflau per mintga persuna e tip siu lungatg caracteristic.
Che la tragedia ha giu tonta attracziun ei secapescha era per gronda part il meret dils acturs, ch’han capiu da seviver en en lur per gronda part grevas rollas. A signur Gion Felici Monn p. m. (morts ils 11 d’october 1954), che ha giu la premura da mussar il toc, astgein nus senz’auter exprimer nossa cumpleina cuntentientscha. La representaziun muossa ch’il regissur ha giu gust, slontsch e capientscha.
Igl ei zatgei bi e commuentond ed ultra da quei actual. Era oz vegn tut cristianissem persequitau, ed era ozildi dat enqual Venantius la veta per la cardientscha.
Tgi che ha pia tschaffen da passentar las duas dumengias in per bialas uras va a Sedrun e nus astgein sincerar ch’el vegni mai a s’enriclar da quell’excursiun.